वाढत्या महागाईने (Inflation) सर्वसामान्यांचे हाल होत आहेत. जीवनावश्यक वस्तूंनंतर आता पेट्रोल, डिझेल, स्वयंपाकाच्या गॅसचे दर वाढले आहेत. कोविडमुळे सर्वकाही महागले आहे. रिअल इस्टेट क्षेत्रालाही वाढत्या महागाईचा फटका बसला आहे. बँकांनी गृहकर्जावरील व्याजदरात वाढ केल्याने चालू आर्थिक वर्षात परवडणाऱ्या घरांचे स्वप्न चकनाचूर होण्याची शक्यता आहे. वाढणारे व्याजदर, महागाई, बांधकाम खर्चात झालेली वाढ आणि इतर अनेक कारणांमुळे परवडणाऱ्या गृहनिर्माण वित्त कंपन्यांना अडचणी येऊ शकतात. इंडिया रेटिंग अँड रिसर्चने गुरुवारी दिलेल्या अहवालानुसार, परवडणाऱ्या गृहनिर्माण कंपन्यांसाठी २५ लाखांपेक्षा कमी किमतीची घरे अतिशय मजबूत विभाग ठरले आहेत. गेल्या दशकात या क्षेत्रात बरीच प्रगती झाली आहे. अहवालानुसार, परवडणाऱ्या गृहनिर्माण क्षेत्राने गेल्या ५ वर्षांत २५ टक्के वार्षिक वाढीसह गृहनिर्माण क्षेत्राच्या एकूण वाढीला मागे टाकले आहे.
परंतु काही कारणांमुळे या परवडणाऱ्या गृहनिर्माण विभागाच्या वाढीची गती आता मंद होऊ शकते. वाढती महागाई, व्याजदरात झालेली वाढ, वाढत्या महागाईमुळे कमी झालेला कॅश फ्लो, उत्पादन खर्चात वाढ झाल्यामुळे मालमत्तेच्या किमतीत झालेली वाढ आणि केंद्र सरकारच्या क्रेडिट लिंक्ड सबसिडी योजनेला स्थगिती यासारख्या अनेक आव्हानांना या क्षेत्राला सामोरे जावे लागत आहे. व्याजदर वाढल्यास गृहकर्ज महाग होते. याचा निश्चित खरेदीदारांवर मोठा परिणाम होणार आहे. जसजसा व्याजदर वाढतो तसतसा ईएमआयही वाढतो. या सर्व घटकांचा परवडणाऱ्या घरांच्या किमतीवर परिणाम होतो.
केंद्र सरकारने क्रेडिट लिंक्ड सबसिडी स्कीम (CLSS) सुरू केली आहे. या योजनेअंतर्गत घर खरेदी करणाऱ्यांना चार श्रेणींमध्ये व्याजात सवलत मिळते. या अनुदानाचा लाभ EWS, LIG, MIG-1 आणि MIG-II या चार विभागांमध्ये उपलब्ध आहे. या योजनेअंतर्गत आतापर्यंत १.४० लाख कुटुंबांना या अनुदानाचा लाभ झाला आहे.
घर बांधताना काही गोष्टी टाळणे फायदेशीर ठरू शकते. सिमेंट, माती, वीट, लोखंडी जाळी, रंग, फिटींगचा खर्च एवढेच नाही तर घर बांधण्यासाठी लागणारे पाणी या गोष्टी टाळल्या तर तुम्ही स्वस्तात परवडणाऱ्या घरांचे स्वप्न पूर्ण करू शकता. अशा महागाईच्या काळात घर बांधताना कोणते साहित्य वापरायचे हे ठरवले तर घर बांधण्याचा खर्च कमी होऊ शकतो. सॅनिटरी वायर, प्लंबिंग घटक, इलेक्ट्रिकल फिटिंग आणि पेंटिंगची किंमत खूप असते. त्यामुळे घराची किंमत वाढते. जर तुम्ही या सर्व गोष्टींचे आउटसोर्स केले तर तुम्हाला कमी मजूर खर्च येईल. तसेच ओळखीतून काम केल्यास वस्तू स्वस्तात मिळतील. तुम्ही थेट डीलरकडून उत्पादन खरेदी केल्यास तुम्हाला सूट मिळेल.
